قبرستان جانے کے مقاصد کا بیان کتاب و سنت کی روشنی میں

 از    July 8, 2014

محترمی و مکرمی حافظ زبیر علی زئی صاحب      السلام علیکم ورحمۃ اللہ وبرکاتہ،
میں احمد خان پھلاڈیوں صوبہ سندھ سے لکھ رہا ہوں۔ ایک مسئلہ ہے کہ کچھ لوگ کہتے ہیں کہ اہلحدیث حضرات جب قل ختم چہلم وغیرہ کو نہیں مانتے تو قبرستان جا کر کیا کرتے ہیں؟ مطلب ہے کہ رسول اللہ صلی اللہ علیہ وسلم کا قبرستان جا کر کیا معمول تھا؟ قرآن پڑھنا بھی قبرستان  پر منع ہے؟ لوگ کہتے ہیں کہ آپ مردہ کو قرآن پڑھ کر بخشنے کے بھی خلاف ہیں؟

الجواب:والسلام ولیکم ورحمتہ اللہ وبرکاتہ،اما بعد: قبرستان جانے کے کئی مقاصد ہیں۔

1۔       نبی کریم صلی اللہ علیہ وسلم کی سنت ہے۔ آپ صلی اللہ علیہ وسلم قبرستان جا کر مُردوں کے لئے دعائیں فرمایا کرتے تھے ۔ سیدہ عائشہ صدیقہ رضی اللہ عنھا فرماتی ہیں کہ :

‘‘حتی جاء البقیع فقام، فأطال القیام ، ثم رفع یدیہ ثلاث مرات، ثم انحرف فانحرفت۔۔۔’’حتی کہ آپ(صلی اللہ علیہ وسلم) بقیع (مدینہ کے قبرستان) پہنچ کر کھڑے ہو گئے، آپ (کافی) لمبی دیر کھڑے رہے۔ پھر آپ نے تین دفعہ(دعا کے لئے) ہاتھ اُٹھائے۔ پھر آپ (صلی اللہ علیہ وسلم ) واپس لوٹے تو میں (بھی) واپس لوٹی۔۔۔[صحیح مسلم، کتاب الجنائز باب مایقال عند و خول القبور و الدعاء لأ ھلھاح ۱۰۳؍۹۷۴ و ترقیم دارالسلام:۲۲۵۶]

پھر آپ صلی اللہ علیہ وسلم نے اپنی زوجہ طیبہ عائشہ صدیقہ رضی اللہ عنہا کو بتایا کہ : جبریل (علیہ السلام) نے آکر مجھے کہا کہ : تیرا رب تجھے حکم دیتا ہے کہ بقیع والوں (کی قبروں) کے پاس جا کر اُن کے لئے (دعائے) استغفار کرو(مسلم : ۹۷۴ حوالہ مذکورہ)

عبداللہ بن ابی ملیکہ (ثقہ فقیہ تابعی) سے روایت ہے کہ :‘‘أن عائشۃ أقبلت ذات یوم من المقابر، فقلت لھا: یا أم المؤمنین من أین أقبلت؟قالت: من قبر أخی عبدالرحمن بن أبی بکر، فقلت لھا: ألیس کان رسول اللہ صلی اللہ علیہ وسلم نھی عن زیارۃ القبور؟قالت: نعم کان نھی ثم أمر بزیار تھا’’بے شک ایک دن(سیدہ) عائشہ (رضی اللہ عنھما) قبرستان سے آئیں تو میں نے ان سے پوچھا: اے ام المؤمنین! آپ کہاں سے آئی ہیں؟ انہوں نے فرمایا: اپنے بھائی عبدالرحمن بن ابی بکر(رضی اللہ عنہ) کی قبر سے۔ میں نے انہیں کہا: کیا رسول اللہ صلی اللہ علیہ وسلم نے قبروں کی زیارت سے منع نہیں کیا تھا؟ انہوں نے فرمایا: جی ہاں، آپ نے منع کیا تھا پھر زیارت (کی رخصت) کا حکم دے دیا تھا۔(المستدرک للحاکم۱؍۳۷۶ح۱۳۹۲و البیھقی ۴؍۷۸ و سندہ صحیح، وصححہ الذھبی و البوصیری وغیر ھما، دیکھئے أحکام الجنائز للألبانی ص ۱۸۱)

اس حدیث سے دو مسئلے ثابت ہوئے۔

اول:      قبروں کی زیارت سے منع والا حکم منسوخ ہے۔

دوم:      عورتوں کے لئے جائز ہے کہ وہ کبھی کبھار اپنے قریبی رشتہ داروں کی قبروں کی زیارت کر لیں۔

صحیح بخاری(۱۲۸۳) کی ایک حدیث کا خلاصہ یہ ہے کہ نبی صلی اللہ علیہ وسلم نے ایک عورت  کو (اپنے بچے کی ) قبر کے پاس روتے دیکھا تو صبر کی نصیحت کی [مگر آپ نے اسے قبر پر آنے سے منع نہیں کیا]دیکھئے فتح الباری(ج۳ص۱۴۸)

تنبیہ(۱): عورتوں کا کثرت سے قبروں کی زیارت کرنا ممنوع ہے  جیسا کہ سیدنا ابو ہریرہ رضی اللہ عنہ سے روایت ہے کہ :‘‘أن رسول اللہ صلی اللہ علیہ وسلم لعن زوارات القبور’’بے شک رسول اللہ صلی اللہ علیہ  وسلم نے قبروں کی بہت زیادہ زیارت کرنے والی عورتوں پر لعنت بھیجی ہے۔(سنن الترمذی، کتاب الجنائز باب ماجاء فی کراھیۃ زیارۃ القبور للنساء ح ۱۰۵۶وقال: ‘‘ھذا حدیث حسن صحیح’’ وصححہ ابن حبان ، الاحسان: ۳۱۷۸و سندہ حسن) 

تنبیہ۲:   عورتوں کا غیر لوگوں کی قبروں کی زیارت کرنا ممنوع ہے۔ سنن ابی داود کی ایک حدیث کا خلاصہ یہ ہے کہ نبی کریم صلی اللہ علیہ وسلم نے (اپنی امت کو سمجھانے کے لئے ) اپنی پیاری بیٹی فاطمہ رضی اللہ عنہا سے فرمایا: اگر تو کُدی (قبرستان) تک چلی جاتی تو۔۔۔ پھر آپ نے سخت الفاظ بیان فرمائے[ح۳۱۲۳و سندہ حسن و صححہ الحاکم علی شرط الشیخین ۱؍۳۷۳ ، ۳۷۴ووافقہ الذھبی(!) وحسنہ المنذری و الھیثمی]

اس حدیث کا راوی ربیعہ بن سیف جمہور محدثین کے نزدیک ثقہ و صدوق ہے دیکھئے نیل المقصود(قلمی۲؍۷۱۴ح۳۱۲۳) و عمدۃ المساعی فی تحقیق سنن النسائی (قلمی۱؍۱۸۸ح ۱۸۸۱)

اس  شدید وعید والی حدیث سے ثابت ہے کہ عورتوں کے لئے غیر مردوں کی قبروں پر جانا ممنوع ہے۔

صحیح مسلم میں ہے کہ آپ صلی اللہ علیہ وسلم نے فرمایا: ‘‘فزورو القبور فإنھا تذکر کم الموت’ پس قبروں کی زیارت کرو کیونکہ بے شک یہ (زیارت ) تمہیں موت یاد دلائے گی۔(ح ۱۰۸؍۹۷۶و دار السلام:۲۲۵۹)

              بریدہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا:‘‘ونھیتکم عن زیارۃ القبور فمن أراد أن یزور فلیزر ولا تقولو اھجراً’’ اور میں نے تمہیں قبروں کی زیارت سے منع کیا تھا، پس جو شخص زیارت کرنا چاہے تو کر لے اور (وہاں ) باطل  باتیں نہ کہنا(سنن النسائی۴؍۸۹ح۲۰۳۵و السنن الکبری للنسائی(۲۱۶۰)و إسنادہ صحیح؍عمدۃ المساعی ۱؍۲۰۳)

2۔       قبرستان پر جانے سے موت اور آخرت کی یاد تازہ ہوتی ہے۔ انسان نصیحت و عبرت حاصل کرتا ہے جیسا کہ ابھی گزر چکا ہے۔

3۔       قبرستان پر جا کر مسلمان مُردوں کے لئے دعائے استغفار کی جاتی ہے۔ نبی صلی اللہ علیہ وسلم (بعض اوقات) رات کے آخری پہر مدینے کے قبرستان بقیع غرقد جا کر یہ دعا فرماتے: ‘‘اللھم اغفر لأ ھل بقیع الغرقد’’ اے اللہ بقیع غرقد والوں کو بخش دے(صحیح مسلم: ۱۰۲؍۹۷۴و دارالسلام: ۲۲۵۵)

تفصیلی دلائل کے  لئے جلیل القدر محدث شیخ البانی رحمہ اللہ کی ‘‘کتاب الجنائز’’ وغیرہ دیکھ لیں۔ مختصراً عرض ہے کہ اہل سنت یعنی اہل حدیث قبرستان پر جا کر مُردوں کے لئے دعا کرتے ہیں اور آخرت و موت کو یاد کرتے ہیں۔ اس طرح نبی کریم صلی اللہ علیہ وسلم کی سنت مبارکہ پر بھی عمل ہو جاتا ہے۔اہل حدیث لوگ قبروں پر جا کر باطل (کتاب و سنت کے مخالف) اعمال نہیں کرتے اور نہ باطل باتیں کرتے ہیں۔ قبروں پر جا کر مُردوں سے دعائیں کرنا، انہیں اللہ کے سامنے بطور وسیلہ پیش کرنا، مُردوں پر شرکیہ و بدعیہ حرکات کرنا، چادریں چڑھانا، قل و چہلم کرنا، قرآن مجید پڑھ کر اس کا ثواب مُردوں کو بخشنا، وغیرہ کاموں کا کوئی ثبوت قرآن و حدیث و اجماع اور آثار سلف صالحین سے نہیں ملتا۔ لہذا یہ سب اعمال باطل ہیں اور اہل حدیث ان سے مکمل طور پر اجتناب کرتے ہیں۔

قبروں پر جو شرکیہ اعمال اور منافی کتاب و سنت حرکات ہو رہی ہیں آپ خود جا کر ان کا نظارہ کر سکتے ہیں تاکہ ان لوگوں کا بذات خود  رد کر سکیں۔ ان قبر پرستوں کی قبر پرستی پر ‘‘أصل عبادۃ الأوثان’’ بتوں کی عبادت کی اصل کا باب باندھ کر علامہ جلال الدین السیوطی(متوفی خ۹۱۱ھ) لکھتے ہیں کہ :

‘‘و لھذا تجد أقواماً کثیرۃً من الضالین یتضرعون عند قبر الصالحین و یخشعون و یتذللون و یعبدو نھم بقلوبھم عبادۃ لا یفعلو نھا فی بیوت اللہ المساجد ، بل ولا فی الأسحار بین یدی اللہ تعالیٰ و یرجون من الصلوۃ عندھا و الدعاء مالا یرجو نہ فی المساجد التی تشد إلیھا الرحال’’
اور اس لئے آپ دیکھتے ہیں کہ بہت سی گمراہ قومیں نیک لوگوں کی قبروں کے پاس گڑگڑاتے ، خشوع اور عاجزی کرتے (ہوئے مانگتے ) ہیں۔ اور اپنے دلوں سے ان (مُردوں) کی ایسی عبادت کرتے ہیں جو اللہ کے (مقرر کردہ)گھروں: مسجدوں میں(اللہ کی عبادت) نہیں کرتے۔ بلکہ سحری کے وقت اللہ کے سامنے کھڑے ہو کر ایسی عبادت نہیں کرتے یہ لوگ قبروں کے پاس نماز و دعاء سے ایسی امیدیں رکھتے ہیں جو وہ مسجد حرام ، مسجد نبوی اور مسجد اقصی میں بھی نہیں رکھتے(الأمر بالا تباع والنھی عن الاتباع ص ۲۳)

یہاں یہ بات بھی یاد رہے کہ صحیح حدیث سے ثابت ہے کہ مسجد حرام، مسجد نبوی اور مسجد اقصی کے علاوہ کسی مسجد یا جگہ کی طرف خاص ثواب و برکت کے لئے سفر کرنا ثابت نہیں ہے دیکھئے صحیح البخاری(۱۱۸۹) و صحیح مسلم (۱۳۹۷) ایک دفعہ سیدنا ابو ہریرہ رضی اللہ عنہ کوہ طور پر تشریف لے گئے تو سیدنا بصرہ بن ابی بصرہ الغفاری رضی اللہ عنہ نے انہیں فرمایا: اگر مجھے آپ کے جانے سے پہلے پتہ چل جاتا تو آپ نہ جاتے ، پھر انہیں نبی صلی اللہ علیہ وسلم کی حدیث سنائی دیکھئے مؤطا امام مالک (ج اص ۱۰۹ح۲۳۹ و سندہ صحیح) اسے ابن حبان(موارد الظمآن: ۱۰۲۴) نے صحیح کہا ہے  اور یہ روایت اپنے بعض متن کے ساتھ        مختصراً سنن ابی داود (۱۰۴۶) و سنن الترمذی (۴۹۱وقال: حسن صحیح) و صحیح ابن خزیمہ (۱۷۳۸) و المستدرک للحاکم (۱؍۲۷۸، ۲۷۹و صححہ علی شرط الشیخین و وافقہ الذھبی)میں موجود ہے۔

معلوم ہوا  کہ کوہ طور پر ثواب حاصل کرنے کے لئے سفر کر کے جانا جائز نہیں ہے تو قبروں کی طرف سفر کر کے جانا بھی جائز نہیں ہے۔ اسی لئے شاہ ولی اللہ الدھلوی الحنفی(متوفی ۱۱۷۶ھ) لکھتے ہیں کہ:

‘‘ و الحق عندی أن القبر و محل عبادۃ ولی من أولیاء اللہ و الطور کل ذلک سواء فی النھی، واللہ أعلم’’اور میرے نزدیک حق یہ ہے کہ بے شک قبر، اللہ کے ولیوں میں سے کسی ولی کی عبادت گاہ اور کوہ طور ممانعت میں سب برابر ہیں واللہ اعلم (حجۃ اللہ البالغہ ج ۱ ص ۱۹۲ من أبواب الصلوۃ؍المساجد)

آپ ان لوگوں سے کہہ دیں کہ ، رسم قل، ملا جی کا ختم شریف، چہلم وغیرہ اعمال کا کوئی ثبوت قرآن و حدیث میں نہیں ہے۔ قرآن پڑھ کر مُردوں کو بخش دینا بھی         کسی دلیل سے ثابت نہیں ہے جبکہ آیت:وَاَنْ لَّیْسَ لِلانْسَانِ اِلَّا مَا سَعٰی : انسان کو وہی ملے گا جس کی وہ کوشش کرے(سورۃ النجم:۳۹)سے ثابت ہے کہ قرآن مجید کا ثواب مُردوں کو نہیں پہنچتا۔

حافظ ابن کثیر الدمشقی(متوفی ۷۷۴ھ) لکھتے ہیں کہ:و من ھذہ الآیہ الکریمۃ استنبط الشافعی رحمہ اللہ ومن اتبعہ أن القراء ۃ لا یصل اھداء ثوابھا إلی الموتی لأ نہ لیس من عملھم ولا کسبھم ولھذا لم یندب إلیہ رسول اللہ صلی اللہ علیہ وسلم أمتہ ولا حثھم علیہ ولا أرشدھم إلیہ بنص ولا إ یماء ولم ینقل ذلک عن أحد من الصحابۃ رضی اللہ عنھم ولو کان خیراً السبقونا إلیہ۔۔۔’’اس آیت کریمہ سے (امام ) شافعی رحمہ اللہ اور ان کے متبعین نے یہ (مسئلہ) استنباط کیا ہے کہ قرأت کا ثواب مُردوں کو بخشنے سے نہیں پہنچتا کیونکہ یہ ان کے اعمال اور کمائی سے نہیں ہے۔ اس لئے رسول اللہ صلی اللہ علیہ وسلم نے اپنی امت کو اس طرف ترغیب اور حکم نہیں دیا اور نہ کوئی صریح یا غیر صریح بات ارشاد فرمائی ہے اور نہ صحابہ رضی اللہ عنہم میں کسی ایک سے یہ کام ثابت ہے۔ اگر یہ کام بہتر ہوتا تو ہم سے پہلے صحابہ کرام رضی اللہ عنہم اس پر عمل کرتے۔(تفسیر ابن کثیر بتحقیق عبدالرزاق المھدی ج ۶ص۳۸، سورۃ النجم:۳۹)

امید ہے کہ اب آپ کو یہ مسئلہ سمجھ آ گیا ہو گا۔ ان شا ء اللہ             وما علینا إلا البلاغ(۹ربیع الاول۱۴۲۶ھ)

نئے مضامین بذریعہ ای میل حاصل کیجیے

تمام مضامین

About Tohed.com

Tohed.com is an Urdu Islamic Website, aiming to preach true Islamic Information based on Qur'an and Sunnah. Here you can find out hundreds of urdu articles by reputed scholars. It's a completely non-commercial project with an objective to propagate Information about Islam in native language for the sub-continent readers.